(Unicode)
ရုရှားနိုင်ငံနှင့် မြန်မာနိုင်ငံတို့ဦးဆောင်၍ (၁၃)ကြိမ်မြောက် အာဆီယံအပေါင်း အကြမ်းဖက်မှုတန်ပြန်တိုက် ဖျက်ရေးဆိုင်ရာ ကျွမ်းကျင်လုပ်ငန်းအဖွဲ့အစည်းအဝေး (13th ADMM-Plus Experts’ Working Group on Counter-Terrorism Meeting EWG on CT Meeting) ကို ၂၀၂၂ ခုနှစ်၊ ဇူလိုင်လ ၂၀ ရက်နှင့် ၂၁ ရက်တို့တွင် ရုရှားနိုင်ငံက အိမ်ရှင်အဖြစ်ဆောင်ရွက်ပြီး ရုရှားနိုင်ငံ၊ မော်စကိုမြို့တွင် ကျင်းပခဲ့သည်။
အစည်းအဝေးသို့ ADMM-Plus EWG-CT ပူးတွဲဥက္ကဌများဖြစ်ကြသော မြန်မာ့တပ်မတော်မှ အရာရှိကြီးများ၊ ရုရှားတပ်မတော်မှ အရာရှိကြီးများနှင့်အတူ အာဆီယံနိုင်ငံများနှင့် ဆွေးနွေးဖက်နိုင်ငံများဖြစ်ကြသော တရုတ်နိုင်ငံတို့နှင့်အတူ အာဆီယံအတွင်းရေးမှူးချုပ်ရုံးမှ ကိုယ်စားလှယ်အဖွဲ့များပါဝင်တက် ရောက်ကြသည်။
အစည်းအဝေးတွင် ပူးတွဲဉက္ကဋ္ဌများဖြစ်ကြသော မြန်မာနိုင်ငံနှင့် ရုရှားနိုင်ငံတို့က အဖွင့်အမှာစကား ပြောကြားပြီးနောက် ရုရှားနိုင်ငံ General Staff of the Armed Forces ရုံးမှ ကိုယ်စားလှယ်တစ်ဦးက နိုင်ငံတကာအကြမ်းဖက်အဖွဲ့အစည်းများ ပေါ်ပေါက်လာပုံနှင့် ရှင်သန်ကြီးထွားလာပုံ၊ ထိုအဖွဲ့အစည်းများကို နှိမ်နင်းရာတွင် ချဉ်းကပ်လေ့လာသည့် နည်းလမ်းများဖြင့် ရုရှားနိုင်ငံက ဆွေးနွေးတင်ပြသည်။
ဆက်လက်၍ အဖွဲ့ဝင်နိုင်ငံများက “အကြမ်းဖက်မှုတိုက်ဖျက်ရေး စစ်ဆင်ရေးများအပြီးတွင် လူသားချင်းစာနာထောက်ထားမှုအရ နေရာချထားရေးလုပ်ငန်းများဆောင်ရွက်ရာတွင် တပ်မတော်၏ အခန်းကဏ္ဍ” “The Role of Armed Forces in Post-Conflict and Humanitarian Settlement in Anti-terrorist Operations” ခေါင်းစဉ်ဖြင့် နိုင်ငံအလိုက် အတွေ့အကြုံများကို ဆွေးနွေးခဲ့ကြပါသည်။
ထို့နောက် ပူးတွဲဉက္ကဋ္ဌများဖြစ်ကြသော မြန်မာနိုင်ငံနှင့် ရုရှားနိုင်ငံတို့မှကိုယ်စားလှယ်များက ADMM- Plus EWG on CT ၏ ဆက်လက်ဆောင်ရွက်မည့်အစီအမံများကို ရှင်းလင်းဆွေးနွေးပြောကြားခဲ့ပြီး အစည်းအဝေးတက်ရောက်လာသည့် အာဆီယံ ၁၀ နိုင်ငံနှင့် ဆွေးနွေးဖက်နိုင်ငံများက စာတမ်းများနှင့် ADMM-Plus EWG on CT ၏ ဆက်လက်ဆောင်ရွက်မည့် အစီအမံများအပေါ် ၎င်းတို့၏အမြင်များ၊ အကြံပြုချက်များအား ဆွေးနွေးခြင်းများ ပြုလုပ်ခဲ့ကြပါသည်။
အစည်းအဝေးတွင် မြန်မာနိုင်ငံကိုယ်စားလှယ်အဖွဲ့အနေဖြင့် ဆွေးနွေးရာတွင် ဖွဲ့စည်းပုံအခြေခံ ဥပဒေ (၂၀၁၈ ခုနှစ်) အရ မြန်မာနိုင်ငံတွင် အကြမ်းဖက်တိုက်ခိုက်မှုများအပြီးတွင် လူသားချင်းစာနာထောက်ထားမှု အရ နေရာချထားရေးလုပ်ငန်းများဆောင်ရွက်ရာတွင် တပ်မတော်၏အခန်းကဏ္ဍနှင့် အကြမ်းဖက်အဖွဲ့အစည်း အဖြစ် သတ်မှတ်ထားသော NUG နှင့် PDF အဖွဲ့များ၏ အကြမ်းဖက်လုပ်ရပ်များကြောင့် ထိခိုက်ဆုံးရှံးမှု ကြုံတွေ့နေရသော ပြည်သူများအား တပ်မတော်သားများက ကယ်ဆယ်ရေးနှင့် ပြန်လည်နေရာချထားရေး ဆောင်ရွက်ပေးနေမှုများအား ရှင်းလင်းဆွေးနွေးခဲ့ပြီး မည်သည့်နိုင်ငံရေးစနစ်ကို ကျင့်သုံးသည်ဖြစ်စေ၊ မည်သည့်အခြေအနေမျိုးတွင်မဆို အကြမ်းဖက်မှုနှင့် ပတ်သက်၍လက်မခံနိုင်ကြောင်း၊ နိုင်ငံတိုင်းတွင် အကြမ်းဖက်မှုတိုက်ဖျက်ရေးလုပ်ငန်းစဉ်အား တစ်ဦးတစ်ယောက်တည်း လုပ်ဆောင်နေရုံဖြင့် ပြီးမြောက် နိုင်မည်မဟုတ်သောကြောင့် နိုင်ငံများပေါင်းစုပြီး လုပ်ဆောင်ရမည်ဖြစ်ကြောင်း ယခုကဲ့သို့လုပ်ဆောင် နေမှုသည် မည်သည့်နိုင်ငံရေး အကျိုးအမြတ်ကိုမှ မျှော်မှန်းပြီး လုပ်ဆောင်နေခြင်းမဟုတ်ဘဲ လူသားအားလုံး၏ ဘဝလုံခြုံရေးအတွက် ဆောင်ရွက်နေရခြင်းဖြစ်ကြောင်း အကြမ်းဖက်မှုတန်ပြန်တိုက်ဖျက်ရေးလုပ်ငန်းများအား ပူးပေါင်းဆောင်ရွက်ကြရန် တိုက်တွန်းပြောကြားလိုကြောင်း မိမိတို့အာဆီယံအဖွဲ့ဝင်နိုင်ငံများအနေဖြင့် ဆွေးနွေးဖက် နိုင်ငံများနှင့်အတူ အကြမ်းဖက်မှုတိုက်ဖျက်ရေး လုပ်ငန်းစဉ်များကို အောင်မြင်အောင် ဆက်လက်ဆောင်ရွက်သွား မည်ဖြစ်ကြောင်း ဆွေးနွေးခဲ့ပါသည်။
မြန်မာနိုင်ငံနှင့် ရုရှားနိုင်ငံတို့သည် ASEAN Defence Minister’s Meeting-Plus (ADMM-Plus) လုပ်ငန်းစဉ်အောက်တွင် အာဆီယံအပေါင်း အကြမ်းဖက်မှုတန်ပြန်တိုက်ဖျက်ရေးဆိုင်ရာကျွမ်းကျင်လုပ်ငန်းအဖွဲ့ (ADMM-Plus on CT ) ၏ ပူးတွဲဉက္ကဋ္ဌများအဖြစ် ၂၀၂၁ ခုနှစ် မှ ၂၀၂၃ အထိ တာဝန်ထမ်းဆောင်လျက်ရှိကြောင်း သတင်းရရှိသည်။
#KT